Mari Katóng Ba’omong Pake Pantun

Beta-pung tujuan dari tulis ini pantun dong sonde laen sonde bukan, andia mau pake bahasa (Malayu) Kupang ko tulis ame satbarang. Nanti kalo orang baca ame ini buku ko dia rasa lucu ato sampe pica katawa, beta barsyukúr karna dia su baca, dan beta ju bilang makasi banya buat dia-pung apresiasi. Itu su lebe dari cukup. Omong-omong, satu kali, beta tanya diri sandiri, “Parlú ko sonde tulis pake bahasa Kupang?” Son lama, te beta jawab sandiri, ma deng partanyaan, “Kanapa sonde, kalo katóng bisa pake ko tulis dan orang bisa baca?”
Lewat ini buku pantun, beta mau ajak Sodara dong samua—yang tenga di Kupang ato tampa laen—ko iko “piara” bahasa Kupang, sebage warisan budaya. Omong bahasa Kupang tu sonde bararti “turun pangkat”. Yang banár tu katóng tatáp inga dan hargai ini bahasa, yang opa-oma dong su kasi tarús di katóng. Ini su katóng-pung giliran ko kasi tarús ini bahasa pi turunan ini hari dan besok-lusa pung.